ഗുജറാത്ത് കലാപം തുറന്നുകാട്ടുന്ന എമ്പുരാൻ; സംവിധായകൻ്റെ ധൈര്യം അപാരമെന്ന് അഭിനന്ദന പ്രവാഹം

പ്രേക്ഷകരുടെ നീണ്ട കാത്തിരിപ്പിനൊപ്പം തിയേറ്ററുകളിൽ എത്തി ‘എമ്പുരാൻ’ തിയേറ്ററുകളിൽ എത്തി. സമകാലിക രാഷ്ട്രീയ വിഷയങ്ങളിലേക്കും ചരിത്രപരമായ യാഥാർത്ഥ്യങ്ങളിലേക്കും വെളിച്ചം വീശുന്ന ഒരു ചലച്ചിത്ര അനുഭവമായി മാറുകയാണ് ഈ ചിത്രം. പൃഥ്വിരാജ് സുകുമാരൻ്റെ സംവിധാന മികവിൽ ഒരുങ്ങിയ ഈ സിനിമ, കേവലം ഒരു വാണിജ്യ സിനിമ എന്നതിലുപരി, പ്രേക്ഷകരെ ചിന്തിപ്പിക്കാനും ആസ്വാദനത്തിൻ്റെ പുതിയ തലങ്ങളിലേക്ക് കൂട്ടിക്കൊണ്ടുപോകുന്നു.

Also Read ഉരുളെടുത്ത ഒരു നാടിൻ്റെ പ്രതീക്ഷകളുടെ ദിനം; വയനാടിൻ്റെ അതിജീവന സ്വപ്നങ്ങൾക്ക് നിറം പകരുമ്പോൾ

സിനിമയിലെ സായിദ് മസൂദ് എന്ന കഥാപാത്രത്തിൻ്റെ ഭൂതകാലം അവതരിപ്പിക്കുമ്പോൾ, 2002-ലെ ഗുജറാത്ത് കലാപത്തിൻ്റെ ഭീകരമായ ഓർമ്മകൾ വീണ്ടും ചർച്ചാവിഷയമാകുകയാണ്. ലൂസിഫറിൻ്റെ ആദ്യ ഭാഗത്തിൽ അവതരിപ്പിക്കപ്പെട്ട കഥാപാത്രങ്ങളെയും അവരുടെ ബന്ധങ്ങളെയും പശ്ചാത്തലത്തെയും പരിചയപ്പെടുത്താനാണ് സംവിധായകൻ സമയം കണ്ടെത്തിയതെങ്കിൽ, എമ്പുരാൻ്റെ ആരംഭം തന്നെ പ്രേക്ഷകരെ ആകാംക്ഷയുടെ മുള്മുനയിൽ നിർത്തുന്ന ഒരു വലിയ ഫ്ലാഷ്ബാക്കിലൂടെയാണ്.

അബ്രാം ഖുറേഷിയുടെ വിശ്വസ്തനായ സായിദ് മസൂദിൻ്റെ (പൃഥ്വിരാജ്) ദുരിതമയമായ ഭൂതകാലമാണ് സിനിമയുടെ ഈ ഭാഗത്ത് അനാവരണം ചെയ്യുന്നത്. 2002-ലെ ഗുജറാത്ത് കലാപത്തിൽ അനാഥനായ സായിദിൻ്റെ കഥ, ബൽരാജ് എന്ന വില്ലൻ കഥാപാത്രവുമായി (അഭിമന്യു സിംഗ്) അഭേദ്യമായി ബന്ധപ്പെട്ടിരിക്കുന്നു. ഹൃദയസ്പർശിയായ വൈകാരികതയിലൂടെയാണ് ഈ ഭാഗം കഥയെ മുന്നോട്ട് കൊണ്ടുപോകുന്നത്.

You May Also Like വീരപ്പൻ ജീവിച്ചിരുന്നെങ്കിൽ…..! ഈ പാര്‍ട്ടിയെപ്പറ്റി നിങ്ങള്‍ക്ക് ഒരു ചുക്കും അറിയില്ല

സിനിമയിലെ ഒരു പ്രധാന രംഗത്തിൽ, ബൽരാജിൻ്റെ കൂട്ടാളികൾ ഗർഭിണിയായ ഒരു മുസ്ലീം സ്ത്രീയെ ആക്രമിക്കുന്നത് കാണിക്കുന്നു. ഈ ദൃശ്യം, 2002-ലെ ഗുജറാത്ത് കലാപത്തിൻ്റെ കറുത്ത അധ്യായങ്ങളിൽ ഒന്നായ നരോദ പാട്യ കൂട്ടക്കൊലയെ പ്രേക്ഷകർക്ക് ഓർമ്മിപ്പിക്കുന്നു. ഗുജറാത്തിൽ കലാപം ഏറ്റവും കൂടുതൽ നാശം വിതച്ച പ്രദേശങ്ങളിൽ ഒന്നാണ് നരോദ. ഇവിടെ, നരോദ പാട്യയിൽ 97 പേരും, തൊട്ടടുത്തുള്ള നരോദ ഗാവിൽ 11 പേരും അതിക്രൂരമായി കൊലചെയ്യപ്പെട്ടത്.

അഭിമന്യു സിംഗിൻ്റെ കഥാപാത്രത്തിന് ‘ബാബ ബജ്റംഗി’ എന്ന് പേര് നൽകിയത് യാദൃശ്ചികമല്ലെന്ന് സിനിമ കണ്ടിറങ്ങിയ പ്രേക്ഷകർ അഭിപ്രായപ്പെടുന്നു. ഈ പേര്, ഗുജറാത്ത് കലാപവുമായി ബന്ധപ്പെട്ട ആരോപണങ്ങൾ നേരിട്ട വ്യക്തിയെ ഓർമ്മിപ്പിക്കുന്നു എന്ന് പലരും വിലയിരുത്തുന്നു. ബാബുഭായ് പട്ടേൽ എന്ന ബാബു ബജ്റംഗി, ബജ്റംഗ്ദലിൻ്റെ ഗുജറാത്ത് ഘടകത്തിൻ്റെ നേതാവായിരുന്നു.

2002-ലെ ഗുജറാത്ത് കലാപത്തിൽ ഇയാൾ ഒരു പ്രധാന പങ്ക് വഹിച്ചുവെന്ന് അന്വേഷണ ഉദ്യോഗസ്ഥൻ കണ്ടെത്തിയിരുന്നു. നരോദ പാട്യ കൂട്ടക്കൊലയുടെ മുഖ്യ സൂത്രധാരനായി കണ്ടെത്തിയതിനെ തുടർന്ന് പ്രത്യേക കോടതി ഇയാൾക്ക് ജീവപര്യന്തം തടവ് ശിക്ഷ വിധിച്ചു. 2019 മാർച്ചിൽ സുപ്രീം കോടതി ഇദ്ദേഹത്തിന് ആരോഗ്യപരമായ കാരണങ്ങളാൽ ജാമ്യം അനുവദിച്ചു.

എന്നാൽ യഥാർത്ഥ കണക്കുകൾ ഇതിലും എത്രയോ അധികമായിരിക്കാം എന്ന് പല മനുഷ്യാവകാശ സംഘടനകളും ആരോപിക്കുന്നു. കലാപത്തിൽ നിരവധി പേർക്ക് വീട് നഷ്ടപ്പെടുകയും പലായനം ചെയ്യേണ്ടി വരികയും ചെയ്തു. നരോദ പാട്യ, ഗുൽബർഗ് സൊസൈറ്റി തുടങ്ങിയ സ്ഥലങ്ങളിൽ നടന്ന കൂട്ടക്കൊലകൾ ഇന്നും നടുക്കുന്ന ഓർമ്മകളാണ്. ‘എമ്പുരാൻ’ എന്ന സിനിമ ഗുജറാത്ത് കലാപത്തിൻ്റെ ഭീകരതയെ പൂർണമായി അവതരിപ്പിക്കുന്നില്ലെങ്കിലും, അതിലെ ചില സൂചനകൾ ചർച്ചയാക്കുന്നു എന്നതാണ് പ്രത്യേകത.