യമുന എക്സ്പ്രസ്സ് വേയിൽ വാഹനാപകടം ; 4 മരണം

യു.പിയിലെ മഥുര ജില്ലയിലെ യമുന എക്സ്പ്രസ് വേയിലുണ്ടായ വൻ വാഹനാപകടത്തിൽ നാല് പേർ മരിക്കുകയും, 66 പേർക്ക് പരിക്കേൽക്കുകയും ചെയ്തതായി റിപ്പോർട്ട്‌. കനത്ത മൂടൽമഞ്ഞാണ് അപകടത്തിന് കാരണമെന്നാണ് കരുതപ്പെടുന്നത്.  എക്സ്പ്രസ് ഹൈവേയിലെ ആഗ്ര-നോയിഡ സ്ട്രെച്ചിൽ ഇന്ന് പുലർച്ചെ 4 മണിയോടെയായിരുന്നു അപകടം. കുറഞ്ഞത് ഏഴ് ബസുകളും മൂന്ന് കാറുകളും തമ്മിൽ കൂട്ടിയിടിച്ചാണ് തീപ്പിടിത്തം ഉണ്ടായത്. അഗ്നിശമന സേനയും, അടിയന്തര രക്ഷാ സേവനങ്ങളും സ്ഥലത്തെത്തി, തീ നിയന്ത്രണവിധേയമാക്കാനും കുടുങ്ങിക്കിടക്കുന്ന യാത്രക്കാരെ രക്ഷിക്കാനുമായി ശ്രമിക്കുന്നുണ്ട്.

Also Read സാധാരണക്കാർക്കിടയിലെ സ്വാധീനം നഷ്ടമായി; ഹിന്ദുത്വത്തെ ചെറുക്കുന്നതിൽ വീഴ്ച പറ്റി; ആത്മവിമർശനവുമായി CPM

ബാൽദേവ് പോലീസ് സ്റ്റേഷൻ പരിധിയിലെ 127-ാം മൈൽസ്റ്റോണിന് സമീപമാണ് അപകടം നടന്നത്. റോഡ് ഗതാഗതം തടസ്സപ്പെട്ടതിനാൽ എക്സ്പ്രസ് ഹൈവേയിലൂടെയുള്ള ഗതാഗതം വഴിതിരിച്ചുവിട്ടു. കുടുങ്ങിയ യാത്രക്കാരെ പിന്നീട് സർക്കാർ വാഹനങ്ങളിൽ അവരുടെ ലക്ഷ്യസ്ഥാനങ്ങളിലേക്ക് അയച്ചു. കൂട്ടിയിടിയെ തുടർന്ന് വലിയ സ്ഫോടനങ്ങൾ ഉണ്ടായതായും രക്ഷാപ്രവർത്തനങ്ങളിൽ സഹായിക്കാൻ പ്രദേശവാസികൾ ഓടിയെത്തിയതായും ദൃക്‌സാക്ഷികൾ പറഞ്ഞു.

ഉത്തർപ്രദേശിലും വടക്കേ ഇന്ത്യയുടെ മറ്റ് ഭാഗങ്ങളിലും കനത്ത മൂടൽമഞ്ഞ് തുടരുന്ന പശ്ചാത്തലത്തിലാണ് സംഭവം. ചൊവ്വാഴ്ച രാവിലെ, ആഗ്ര, പ്രയാഗ്‌രാജ്, ബറേലി, മൊറാദാബാദ് എന്നിവയുൾപ്പെടെ നിരവധി നഗരങ്ങളിൽ ദൃശ്യത പൂജ്യത്തിനടുത്തായിരുന്നു. കഴിഞ്ഞ ദിവസങ്ങളിൽ സംസ്ഥാനത്ത് മൂടൽമഞ്ഞുമായി ബന്ധപ്പെട്ട നിരവധി റോഡപകടങ്ങൾ റിപ്പോർട്ട് ചെയ്തിട്ടുണ്ട്. തിങ്കളാഴ്ച 31 വാഹനങ്ങൾ ഉൾപ്പെട്ട ആറ് അപകടങ്ങൾ റിപ്പോർട്ട് ചെയ്യപ്പെട്ടു. ഞായറാഴ്ച 29 വാഹനങ്ങൾ ഉൾപ്പെട്ട ആറ് അപകടങ്ങളിലായി ഏഴ് പേർ മരിച്ചു. ശനിയാഴ്ച 40 വാഹനങ്ങൾ ഉൾപ്പെട്ട എട്ട് അപകടങ്ങളിലായി നാല് പേർ മരിച്ചു. മരിച്ചവരുടെ കുടുംബങ്ങൾക്ക് മുഖ്യമന്ത്രി യോഗി ആദിത്യനാഥ് അനുശോചനം രേഖപ്പെടുത്തുകയും പരിക്കേറ്റവർക്ക് ശരിയായ ചികിത്സ ഉറപ്പാക്കാൻ ഉദ്യോഗസ്ഥർക്ക് നിർദ്ദേശം നൽകുകയും ചെയ്തു.

You May Also Like ശബരിമല സ്വർണ്ണക്കൊള്ള കേസ് ; മുരാരി ബാബുവിന്റെ ജാമ്യാപേക്ഷ കോടതി നാളെ പരിഗണിക്കും